سألت نفسي تاني ليييييه ؟؟ هو انا ليه فتحت المدونة دي مع ان محدش بيقراها غيري .. يمكن عشان ألاقي شباك أصرخ منه بعد كتمان طويل هد كل مشاعري وصابها بالشيخوخة

شباك أشوف منه الشمس .. يمكن لأن حياتي مضلمة من زمان

شباك حد يشوفني فيه على حقيقتي إنسان بمشاعر والم ودموع وذكريات وأفراح تطل على استحياء ..لكن تقريبا واقفة في الشباك بس لسه مقفول وروحي وراه بتصرخ وقلبي لسه مسجون ورا سور كبير وحديد الشباك سايب علامة على ايدي من كتر مااتعلقت بيه والصدا بياكل فيه من دموعي...

مش عارفة الخوف اللي قاتلني دا على مين ولا من ايه ؟؟ .. على نفسي المهزومة ولا على البلد دي اللي عجزت وشابت م الأهوال اللي شافتها ولا من المستقبل  اللي مش باينله ملامح ولا من الصمت القاتل ولا من أني أموت وحيدة ولا من القبر اللي مستنيني مهما فرحت او حزنت ولا من ميزان الأعمال ..

يارب ارحمني في الدنيا والآخرة 

أنا ليه؟؟!!

النهارده يوم ميلادي قعدت افكر في التلاتين سنة اللي فاتوا وسألت نفسي هو انا ليه كده ؟؟!! كده ايه ؟!!..امممممممم .. يعني مثلا النشأة الصارمة خلتني متهاونش في أي غلط مهما كان تافه وسخيف .. وفي نفس الوقت برضو أقدر أحط نفسي مكان أي حد والتمس له العذر بالرغم من استنكار الناس لأفعاله

، أقدر أي أواجه أي سلطة سواء كان رئيس في العمل أو ضابط شرطة أو حتى مدير مدرسة مفتري زماااان ومع ذلك مقدرش أقول لحد : لأ ، وبسبب كده بحمل نفسي فوق طاقتي وكمان دموعي تغلبني في أي موقف بسيط ولو عتاب محبة أو طفل بيبكي .

. أقدر أعيش لوحدي وقدرت فعلا ـ لمدة طويييلة ـ ونفس الوقت بحب اللمة والدفا وبحن لكل اللي بحبهم ، أفرح اوي للناس وفرحتهم وبرضو أحزن جدا لنفسي وبعمق ..

 أحب احقق حلم لغيري مع ان أحلامي كلها مركونة ع الرف وعليها شبر تراب 

حاجة غريبة فعلا هو في حد كده ولا انا لوحدي ؟؟!! وياترى ليييه؟؟

ياااااااارب

سنة جديدة بدأت .. حبيت أتكلم .. لقيت الحروف عطلانة .. وتفكيري متلخبط ومشوش يمكن عشان كده بكتب بالعامية
لكل اللي عندهم أسباب تسعدهم : يارب دايما
واللي معندهمش يقفوا في الصف ويقولوا كلمة واحدة : يااااااارب